Insan máplerin joqarı dárejege kóterip, onıń nızamlı huqıq hám máplerin támiyinlew eń áhmiyetli másele. Búgingi kúnde barlıq mámleketlik uyımlarda xalıqtıń múrájatları menen islesiw boyınsha engizilgen mexanizm turmısta ózin aqlap, tek dáreje kórsetkishi emes, al sapa jaǵınan da unamlı nátiyje berip atır. Bunıń ayqın mısalı sıpatında, qala hám rayonlarda taraw basshılar tárepinen ótkerilip atırǵan kóshpeli qabıllawlardı aytıw orınlı.
Usı tiykarda, Qaraózek rayonında Qaraqalpaqstan Respublikası sudı hám Qaraqalpaqstan Respublikası hákimshilik sudı, Qaraqalpaqstan Respublikası sudları sudyaları kvalifikaciyalıq kollegiyası basshıları tárepinen kóshpeli qabıllaw ótkerildi.
Qabıllawda Qaraózek, Taxtakópir, Shımbay rayonlarınan 40 tan aslam puqaranıń sud-huqıq tarawına baylanıslı múrájatları tıńlandı.
Qabıllawda dáslep, xalıqtıń sud-huqıq máseleleri boyınsha múrájatları jınayat, puqaralıq, ekonomikalıq hám hákimshilik islerge baylanıslılıǵı ajıratılıp, hár bir puqara Respublika sudlarınıń basshıları hám olardıń orınbasarları tárepinen qabıl etildi.
Qaraózek rayonı “Qutlı mákan” mákan puqaralar jıyını turǵını Sh. Bekturaǵanova tanısı bankten kredit alıp, oǵan kepil bolǵanlıǵı, mine aradan waqıt ótip tanısı kredit tólemlerin óz waqtında bankke tólemegenligi sebepli arada óz-ara túsinbewshilikler payda bolǵanlıǵın aytıp múrájat etti.
Usı rayon turǵını N.Tairova perzenti qaytıs bolǵanlıǵı sebepli onıń qarsısına toplanǵan Qaraózek rayonı Májbúriy orınlaw byurosındaǵı orınlaw qaǵazın toqtatıwdı sorap sud basshılarına múrájat etti. Bul másele usı jerdiń ózinde úyrenilip, puqaranıń múrájatı qanaatlandırıldı.
Puqara R.Aymuratov Ózbekstan Respublikası Hákimshilik juwapkershilik haqqındaǵı kodekstiń 215 prim 5-statyası (mámleketlik xızmetlerdi kórsetiw tarawındaǵı nızamshılıqtı buzıw) 1-bólimi menen juwapkershilikke tartılǵanlıǵın hám tayınlanǵan járiyma summasın kemeyttirip beriwdi sorap qılǵan múrájatı da usı kóshpeli qabıllaw barısında qanaatlandırıldı.
Qabıllaw dawamında mashqalalı máseleler de úyrenilip, puqaralarǵa sudqa dawa arza beriw, sud qararlarınan narazı bolsa ústinen shaǵım etiw máselesinde qaysı organǵa múrájat etiwi kerekligi boyınsha da huqıqıy túsinikler berildi.
Sonday-aq, qabıllaw barısında kóshpeli sud májilisi de ótkerilip, Qaraózek rayonı IIB probaciya esabında turǵan 1 shaxsqa tayınlanǵan jaza, jeńilregine almastırıldı.
Qaraózek rayonı hákimligi málimleme xızmeti
