Ózbekstan Respublikası Prezidentiniń 2021-jıl 3-fevral kúngi «2017-2021 jıllarda Ózbekstan Respublikasın rawajlandırıwdıń bes áhmiyetli baslama boyınsha Háreketler strategiyasın «Jaslardı qollap-quwatlaw hám xalıqtıń salamatlıǵın bekkemlew jılı»nda ámelge asırıwǵa baylanıslı mámleketlik baǵdarlama haqqında»ǵı PP-6155-sanlı pármanınıń orınlanıwın támiyinlew maqsetinde 2021-jıl 13-aprel kúni “Xalıqaralıq imtixan sistemaları boyınsha joqarı ball (dáreje) toplaǵan jaslarǵa imtixan tapsırıw qárejetlerin tolıq qaplap beriw tártibin belgilew haqqında”ǵı Ministrler Kabinetiniń 209-sanlı qararı qabıl etildi.
Qararǵa muwapıq, Xalqaralıq imtixan sistemaları boyınsha joqarı ball (dáreje) alǵan jaslarǵa imtixan tapsırıw qárejetlerin tolıq qaplap beriwdiń hákimshilik reglamenti hám imtixan tapsırıw qárejeti kompensaciya etiletuǵın xalıqaralıq imtihan sistemaları dizimi tastıyıqlandı.
I.Qarar menen tómendegiler belgilengen:
Jaslar isleri agentligi tárepinen 18 túrdegi xalıqaralıq imtixan sisteması boyınsha joqarı ball alǵan jaslarǵa imtixan tapsırıw qárejetlerin tolıq qaplap beriledi, bunda:
2021-jıl 1-may sánesinen baslap IELTS, TOEFL, GMAT, GRE, SAT imtixanlarınan joqarı ball alǵanlarǵa;
2022-jıl 1-yanvardan baslap qalǵan 13 túrdegi francuz, nemis, ispan, italyan, rus, arab, túrk, koreys, qıtay sıyaqlı sırt el tilleri boyınsha imtixan tapsırıw qárejetlerin tolıq qaplap beriledi.
Imtixan tapsırıw qárejetlerin tolıq qaplap beriw boyınsha múrájatlar Mámleketlik xızmetler orayları hámde Birden bir interaktiv mámleketlik xızmetler portalı arqalı ámelge asırıladı. Bunda mámleketlik xızmetin kórsetiw elektron formada tólemsiz ámelge asırıladı;
- Kompensaciya tólep beriw tómendegi tártipte ámelge asırılıwı belgilengen:
1) Xalıqaralıq imtixanlarda joqarı ball alǵan jaslar imtixan qárejetlerin qaplap beriw ushın sertifikat alǵanınan 180 kún ishinde qálegen rayon (qala) Mámleketlik xızmetler orayları yamasa Birden bir interaktiv mámleketlik xızmetler portalı arqalı kórsetilgen sorawnamanı elektron formada toltıradı hám imtixan tapsırıw qárejeti tólengenligin tastıyıqlawshı tólew kvitanciya hámde arnawlı sertifikattı qosımsha etip jiberedi.
Múrájat etiw processinde arza beriwshi kompensaciyanı alıw ushın ózi ushın qolay aymaqtaǵı Xalıq banki filialın tańlaydı. Múrájat arza beriwshi tárepinen tastıyıqlanǵannan soń 10 minut dawamında portal arqalı múrájat etkende avtomatik túrde Jaslar isleri agentligine elektron formada jiberiledi.
2) Jaslar isleri agentligi arza beriwshiniń múrájatı kelip túsken waqıttan baslap 15 kalendar kún dawamında arnawlı sertifikattı tekseriwden ótkizedi hám arza beriwshilerdiń elektron reestrin qáliplestiredi, usı elektron reestrdi hám oǵan muwapıq kompensaciya qárejetlerin Ózbekstan Respublikası akcionerlik kommerciyalıq “Xalıq banki”niń esap betine túsiredi hám xızmet nátiyjesi boyınsha arza beriwshige SMS xabar jiberedi.
3) Xalıq banki filialı arza beriwshiniń kompensaciya pulın alıwǵa bolǵan huqıqtı tastıyıqlaǵan halda usı kompensaciya naq yaki naqsız formada tólewdi ámelge asıradı. Aldın imtixanlardıń bir túri boyınsha imtixan tapsırıw qárejeti kompensaciyasın alǵan arza beriwshige imtixanlardıń usı túri boyınsha tákirarıy tapsırılǵan imtixan qárejetleri qaplanbaydı. Aldın imtixanlardıń bir túri boyınsha imtixan tapsırıw qárejeti kompensaciyasın algan arza beriwshi imtixanlardıń basqa túri boyınsha minimal kórsetkish yamasa onnan joqarı nátiyje kórsetse, oǵan Reglament talaplarına muwapıq kompensaciya tólep beriledi.
On altı jasqa tolmaǵan puqaralardıń imtixan tapsırıw qárejetin kompensaciya etiwdi sorap usı puqaralardıń nızamlı wákilleri múrájat etiwi múmkin.
Bunda kompensaciya usı Reglament talaplarına muwapıq on altı jasqa tolmaǵan puqaralardıń nızamlı wákillerine tólep beriledi.
Qarardan gózlengen maqset «Puqaralar emes xújjetler háreketlenedi» principi tiykarında qaǵazbazlıqtıń aldın alıw puqaralardıń waqtın tejew hámde mámleketlik uyımlarǵa puqaralardıń isenimin elede arttırıw bolıp tabıladı.
Qaraózek rayonı Mámleketlik
xızmetler orayı bólim baslıǵı: A.Dosımbetov
