Qaraózek rayonı xalıq bilimlendiriw bólimine qaraslı 6-sanlı ulıwma orta bilim beriw mektebinde Respublika Ruwxıylıq hám aǵartıw orayı Qaraózek rayonlıq bólimi tárepinen ulıwma orta bilim beriw mekteplerindegi dóretiwshi-mádeniy máseleler boyınsha úgit-násiyatshılar jumıslarınıń nátiyjeligin arttırıwǵa qaratılǵan ámeliy seminar-trening shólkemlestirildi. Ilajǵa rayonlıq Xalıq bilimlendiriw bóliminen qánigeler, mekteplerdegi úgit-násiyatshılar hám ǵalaba xabar quralları wákilleri qatnastı. Seminar trening Tashkent qalasında arnawlı metodikalıq bilim alıp kelgen qánige B.Salieva hám M. Izimbetovalar tárepinen alıp barıldı. Seminar-treningte Dóretiwshi-mádeniy máseleler boyınsha úgit-násiyatshılardıń tiykarǵı wazıypaları, dóretiwshilik talantı bolǵan oqıwshılardı tańlap alıw hám olar menen islesiw metodikası, sonday-aq, oqıwshılardıń kitapqumarlıq hám talqılaw uqıbın arttırıw, audio kitaplardı tıńlaw kónlikpesin rawajlandırıw sıyaqlı ámeliy shınıǵıwlarǵa baǵdarlanǵan usıllar menen qatnasıwshılar keńnen tanıstırıldı. Seminar-trening úgit-násiyatshılardıń aldaǵı jumısların ele jetilistiriw, oqıwshı jaslardıń qábetlerin júzege shıǵarıw barısında ámelge asırılatuǵın pikir usınısları menen dawam etti.