Qaraózek rayonındaǵı «Berdaq» awıl puqaralar jıyını “Shayxanakópir” elatlı punkti aymaǵınan mámleketlik-jeke sherikshilik tiykarında shólkemlestirilip atırǵan «Juldızsha Dos» mámleketlik emes mektepke shekemgi bilimlendiriw shólkemi paydalanıwǵa tapsırıldı. Búgin usı imarattıń ashılıw saltanatı ótkerilip, onda rayon hákiminiń orınbasarı hám awıl aqsaqalları sózge shıǵıp, jıynalǵanlardı jańa imarattıń ashılıwı menen qutlıqladı hám jas jetkensheklerimizdi tárbiyalap atırǵan tárbiyashılardıń mashaqatlı jumıslarında tabıslar tiledi. Ashılıw saltanatta dástúriy lenta kesilip, miymanlar baqshanıń ishki qolaylıqları menen tanısıp shıqtı. Bunnan soń qatnasıwshılar baqsha balalarınıń tayarlaǵan yoshlı koncert baǵdarlamaların tamashaladı.

Qosımsha maǵlıwmat ushın: «Juldızsha Dos» mámleketlik emes mektepke shekemgi bilimlendiriw shólkemi 100 orınǵa mólsherlengen bolıp, jámi joybarǵa qaratılǵan investiciya 1 mlrd 910 mln.sumdı quraydı. Sonnan 1 mlrd 432,5 mln.sum qarjı bank krediti esabınan, 477,5 mln.sum qarjı isbilermen esabınan. Mektepke shekemgi bilimlendiriw shólkemi balalar ushın barlıq qolaylıqlarǵa iye asxana, shınıǵıw xanaları hámde jataqxanalar zamanagóy ásbap-úskeneler menen támiyinlengen. Bilimlendiriw shólkeminde kúndelikli shınıǵıwlardan basqa qosımsha ingliz tili, rus tili hámde sport dógerekleri shólkemlestirilgen. Balalarǵa tájiriybeli tárbiyashılar, qánigeli aspaz hám miyirbiykeler xızmet kórsetedi.