Gazeta haqqında sóz ketkende men izge qaytıwǵa májbúrmen. Sebebi hár bir ótken kúnimiz biz ushın tariyx. Al “Ustaz jolı” gazetasına toqtaytuǵın bolsam, ol meniń dártlesim, sırlasım, metodik járdemshim, óz-ara tájiriybe almasatuǵın, gazetada járiyalanǵan sabaq islenbelerdi óz tájiriybemde sınap kóriwge múmkinshilik bergen laboratoriya mektebi boldı desem de boladı.

   Mına waqıya ele esimde.

    Universitetti 1996-jılı pitkerip, ele bólistiriw bolmay atır. Bir kúni ákejanım hal-awhal sorap telefonnan sóylesti. “Qızım, úy-ishiń aman ba dep sorasıp bolıp, gazetaǵa jazılǵan beken úy-ishiń, eger jazılmasa dárriw pochtaǵa barda jazıl,-dedi. Sebebi, úyde gazetasız ótken kúnimizdi esley almayman. Dárriw barıp jazılǵan gazetam “Ustaz jolı” boldı. Sonnan beri hár bir sanın podchivka etip taqlap qoyaman, lekin, karantin waqıttan beri sál úzilisler bolıp qaldı. Ol waqıtları dım kóp gazetaǵa jazılar edi. Ǵárezsizlikke eriskenimizden soń gazetanıń bahaları qımbatlap ketken waqıtta kópshiliktiń Rossiyadaǵı basılımnan shıqqan gazetalarǵa jazılıw tómenlep ketti. Sol waqıtta ákejanım túni menen awdarmalap maǵan jazdırtıp, erteńine rayonlıq gazetaǵa sol maqalalardı járiyalaytuǵın edi. Sonda ákejanım: “Házir xalıqtıń qaltası kótermeydi, biraq sonday jaqsı maqala, materiallardı olar da oqısın,”- dep túngi uyqısın qıyıp jumıs isler edi. Mende ákejanım aldında juwapkershilik júdá kúshli edi, jazıp otırıp qátelesip ketpegeymen dep. Meniń de gazetaǵa qattıǵa maqala jazǵım keler edi, lekin ákesi jazıp bergenǵo degen sózler jaqpas edi. 2004-jılı ákejanım qaytıs bolǵanda “Ákejanımdı eslesem” degen 1-maqalam rayonlıq gazetada jarıq kórdi.

   1996-jıldan beri men “Ustaz jolı”nıń úzliksiz jazılıp kiyatırǵan ıqlasbentimen. Gazetada shıqqan hár bir maqalanı erinbey oqıyman. Bul gazetaǵa eń 1-maqalam mektebimiz taza imaratqa kóshken waqıtta ustazımız Tamara apa Baymanova “Shuxrat” medalın alǵan edi, usı múnásibet penen “Mektep qos quwanısh qushaǵında” atlı maqalam boldı. Gazetanıń jáne bir tárepi ishki sezimlerińdi ayrım gazetalarday qırqıp taslamaydı. Deb diwińdi arqayın jetkize alasań.

   Házir kópshilik gazetaǵa jazılıw májbúriy emes deydi, lekin men hár jılı “Ustaz jolı”na jazılıp kiyatırman. Gazeta oqıwdıń geshti basqasha emes pe?

Zulfiya Ashirbekova

Qaraózek rayonı 2-sanlı shet tillerine qánigelestirilgen ulıwma orta bilim beriw mektebiniń oqıw isleri boyınsha direktor orınbasarı.