Rayondaǵı 1-sanlı ulıwma bilim beriw mektebinde Berdaq atındaǵı Qaraqalpaq mámleketlik universiteti hám de rayon hákimiyatı menen birgelikte Ózbekstan Qaharmanı, professor Ǵayratdin Xojaniyazovtı eslep «QAHARMAN OQÍǴAN MEKTEP» atamasında úsh áwlad ushırasıwı keshesi bolıp ótti.
Ushırasıwǵa rayon hákiminiń orınbasarı I. Kosıbaev, universitetiń bir qatar oqıtıwshıları, tuwǵan-tuwısqanları, perzentleri, sonday-aq marxum ustazdıń kásiplesleri, shákirtleri hám de rayon jasları qatnastı.
Ushırasıwdı ótkeriwden baslı maqset, Qaraqalpaqstan Respublikasına miyneti sińgen ustazdıń atın mángilestiriw, pidákerlik miynetlerin, tariyx betlerinde ashılǵan jańalıqlarǵa qosqan úleslerin keleshek áwladqa keńnen tanıtıp barıwdan ibarat.
Ushırısıw barısında bayanatshılar Ǵ.Xojaniyazovtıń Ózbekstan Ilimler Akademiyası Qaraqalpaqstan bólimi tariyx institutınıń arxeologiya bóliminde tájiriybeli alımlar menen birgelikte dala izertlew jumısların alıp barıw waqtındaǵı iskerlikleri, Qırantaw tóbeliginde 2000-jıldan baslap Franciyalı alımlar menen birgelikte izertlew jumısları júrgizilgen dáwirleri, onıń pidayılıq miynetleri nátiyjesinde Qubla Aral boyı arxeologiyasında hám Xorezm walayatı aymaǵındaǵı tariyxıy orınlarınan bir neshe arxeologiyalıq esteliklerdiń ashılıwındaǵı hızmetleri, sonday-aq Qaraqalpaq arxeologiyasın izerlewler barısında tariyxıy esteliklerden tabılǵan materiallıq derekler menen bayıtıwda qosqan biybaha úlesleri haqqında keńnen túsinikler berildi.
Ushırasıw sońında rayon hákimligi tárepinen shólkemlestiriwshilerge “Minnetdarshılıq” bildirildi.
Ushırasıw mazmunlı ótkerilip, juwmaǵında Ǵ. Xojaniyazovtıń iygilikli islerine baǵıshlanǵan video-rolik hám prezentaciyalar qatnasıwshılar názerine usınıldı.
Qaraózek rayonı hákimligi málimleme xızmeti