Nawrız bayramınıń tákirarlanbas ózgesheligi bar, ol hár bir úyde, hár bir elde, pútkil jer júzinde tınıshlıq hám tatıwlıqtı saqlawǵa shaqıradı. Bul bayramda hár qıylı ókpe hám giyneler umıtıladı, urıs jánjeller toqtaydı, óz-ara kelisim, tatıwlıq, adamgershilik júzege keledi. Áyyemnen kelip jetken bunday muxaddes kún dástúrlerimizdi qádirlew, teberik jası úlkenlerimizdiń duwasın alıw hám nawqaslardan xabar alıw bul bayramnıń jáne bir pazıyletleriniń biri bolıp tabıladı.
Nawrız ulıwma xalıqlıq bayramı múnásibeti menen rayonımızdaǵı ǵárezsizlik maydanında bayram seyilleri ótkerilmekte.
Bayram ilajında rayon hákiminiń orınbasarı I. Qosıbaev hám rayonlıq Nuranıylar Keńesi baslıǵı M. Gúlimbetov hám belsendi jaslarımız rayon xalqın ulıstıń ullı kúni Nawrız áyyamı menen qızǵın qutlıqladı.

Shıǵıp sóylewshiler, óz sózlerinde ósip kiyatırǵan jas áwladtı kámil insanlar etip tárbiyalawda, olardıń qálbinde watansúyiwshilik, milliy qádriyatlarımızǵa húrmet, tábiyattı qásterlep-abaylaw sıyaqlı sezimlerdi oyatıwda, bul áyyemgi bayram úlken áhmiyetke iye ekenligin atap ótti. Usı kúni rayonımızdaǵı bir qatar belsendi oqıwshılar menen olardıń ustazları, ata-anaları rayon hákimliginiń bahalı sawǵaları menen sıylıqlandı.
Bunnan soń hayal-qızlarımız tárepinen tayarlanǵan milliy taǵamlar, milliy úrp-ádet dástúrlerimizdi sáwlelendiriwshi kórgizbeler menen sport oyınları shólkemlestirildi.
Bayram seyillerinde xalqımızǵa inam etilgen koncert baǵdarlamaları hám saxnalastırılǵan bayram tamashaları jıynalǵanlarǵa úlken zawıq baǵıshladı.
Rayonımız boylap bayram seyilleri dawam etpekte.