Бийдай орағының таярлық жумыслары көзден өткерилди.

Халқымыздың мол ырысқы-несийбеси болған бийдайдан мол өним жетистириў оны сепситпей жыйнап терип алыў бүгинги күнниң әҳмийетли жумысларының бири есапланады.

Жақынласып қалған бийдай орағына қатнасыўшы техникаларды мәўсимге таярлаў ҳәм ремонлаў жумыслары жуўмақланып, ендиги дыққат итибар бийдай орағын сапалы түйеклеўге қаратылған.

 Усы мүнәсибет пенен районда, бийдай мапазының таярлық жумысларына арналған көргизбели семинар болып өтти. Семинарға Агросанаат комплекси үстинен қадағалаў инспекциясының Қарақалпақстан Республикасы басқармасы баслығының орынбасары П. Абдикеримов ҳәм усы инспекцияның аға инспекторы А. Айтжанов, район ҳәкиминиң аўыл ҳәм суў хожалығы мәселелери бойынша орынбасары А. Жуманазаровлар қатнасты.

Семинарға келген қәнигелер бийдай орағына қатнасыўшы комбайнлардың сазлығын көзден өткерип, механизаторлардың жағдайлары менен танысты.

Усы күни районлық медицина бирлеспеси шыпакерлери тәрепинен механизаторлардың ден-саўлықлары тексериўден өткерилди.