Mámleketimizde sońǵı jıllarda elimiz basshısınıń baslaması menen puqaralardıń konstituciyalıq haq-huqıqların tolıq támiyinlew boyınsha bir qansha jumıslar ámelge asırıldı. Ásirese, usı tarawda Ózbekstan Respublikasınıń 2020-jılı 13-martdaǵı «Ózbekstan Respublikasınıń puqaralıǵı haqqında» ǵı Nızamına ózgeris hám qosımshalar kirgizildi.
Bunnan kórinip turǵanınday, ózgeris hám qosımshalar puqaralarımızdıń ásirese, mámleketimizde turaqlı jasawshı puqaralıǵı bolmaǵan shaxslardıń huqıq hám máplerin tolıq hám bunnan bılayda nátiyjeli qorǵawǵa qaratılǵanı menen áhmiyetli bolıp sanaladı.
Mámleketimizde turaqlı jasawshı puqaralıǵı bolmaǵan shaxslardıń Ózbekstan Respublikasınıń puqaralıǵın tán alıw institutı engizildi.
Eń áhmiyetli táreplerinen biri, Nızamnıń 6-statyasınıń 1-bólimi yaǵnıy, mámleketimiz aymaǵına 2005-jıl 1-yanvarǵa shekem turaqlı jasaw ornı boyınsha esapqa alınǵan hámde dáslep shet el puqaralıǵın qabıl etpegen shaxs óz qálewin bildirgen jaǵdayda, Ózbekstan Respublikası puqaralıǵına tán alınadı dep kórsetilgen. Sonday-aq puqara ózin Ózbekstan Respublikası puqarası dep tán alıw boyınsha arza menen múrájat etken kúnge shekem, Ózbekstan Respublikasında keminde on bes jıl dawamında turaqlı jasap kiyatırǵan hámde usı dáwir ishinde shet el puqaralıǵın qabıl etpegen shaxs Ózbekstan Respublikası puqaralıǵına tán alınatuǵınlıǵı kórsetilgen.
Sonıń menen birge Nızamnıń 19-statyası boyınsha Ózbekstan Respublikasında tuwılǵan hám jasap kiyatırǵan puqaralıǵı bolmaǵan shaxslar Ózbekstan puqaralıǵın alıw maqsetinde iltimasnama menen múrájat etkenge shekem bes jıl dawamında (puqaralıǵı bolmaǵan shaxsqa jasaw guwalıǵı alǵan kúnnen baslap) úziliksiz jasaw shárti biykar etildi. Bul degeni Ózbekstanda tuwılıp, Ózbekstanda jasap atırǵan puqaralıǵı bolmaǵan shaxs jasaw guwalıǵın qashan alıwına qaramastan Ózbekstan puqaralıǵın qabıl etiw boyınsha iltimasnama menen múrájat ete alıwı belgilengen.
Bunnan tısqarı, tuwılǵan jeri hám ata-anasınıń puqaralıǵı boyınsha balalardı Ózbekstan Respublikası puqaralıǵına qabıl qılıw tártibi belgilenip, puqaralıq tarawında bala huqıqları bekkemlendi. Bul boyınsha mısal etip aytatuǵın bolsaq, Nızamnıń 6-statyası 3-bólimi boyınsha ata-anasınan biri (jalǵız ákesi yaki anası) Ózbekstan Respublikası puqarası dep tán alınǵan, shet el puqaralıǵın qabıl etpegen hám Ózbekstan Respublikasında jasap kiyatırǵan bala óz qálewin bildirgen jaǵdayda, Ózbekstan Respublikası puqarası dep tán alınadı dep kórsetigen.
Bul Nızamda belgilengen ózgeris hám qosımshalar boyınsha Qaraózek rayonında 7 puqaralıǵı bolmaǵan shaxslardan 1 puqaralıǵı bolmaǵan shaxs Ótewliev Elibay Ótebaevichtıń 2005-jıl 1-yanvarǵa shekem hám on bes jıl dawamında turaqlı jasaw ornı boyınsha esapqa alınǵanlıǵın tastıyıqlawshı hújjetleri bolıp, házirde bul shaxslarǵa identifikaciya ID-kartasın beriw sharaları kórilmekte.

Qaraózek rayonı Ishki isler bólimi Migraciya hám puqaralıqtı rásmiylestiriw bólimshesi baslıǵı kapitan Jadigerov Abdibek Urgenishbaevich