Ózbekstan Respublikası Prezidenti Sh. M .Mirziyoev basshılıǵında 2022-jıl 5-aprel kúngi keńeyttirilgen tárizde ótkerilgen videoselektorında xalıq bilimlendiriwi sistemasında ámelge asırılıp atırǵan reformalardı qollap-quwatlaw maqsetinde, balalar tárbiyası, qatnas hám ruwxıy ortalıq boyınsha “qızıl” kategoriyaǵa kiritilgen, social-ruwxıy ortalıǵı qanaatlandırarsız dep tabılǵan mekteplerde isshi topar óz jumıs xızmetin dawam ettirdi.
Qaraózek rayonındaǵı 26-21-13-sanlı mekteplerdegi ruwxıy-aǵartıwshılıq baǵdarda ámelge asırılǵan jumıslar analiz etildi. Bul mekteplerde jol qoyılǵan kemshilikler hám mashqalalardıń sheshimi sheńberinde metodikalıq járdemler kórsetildi.
Usı múnásebet penen mekteplerde ruwxıy-aǵartıwshılıq hám de sport ilajları shólkemlestirilip, bul ilajda Xalıq bilimlendiriw ministrliginiń huqıqıy qadaǵalaw xızmeti bas qánigesi E. Xudaybergenov penen birgelikte, Qaraqalpaqstan Respublikası Xalıq bilimlendiriw ministri orınbasarı Sh.Tajimuratov, rayon hákiminiń orınbasarı I. Qosıbaev hám de Qaraózek rayonı xalıq bilimlendiriw bólimi baslıǵı A. Qalilaevlar qatnastı.
Miymanlar mekteplerde islengen muzıka, súwretshilik, teatr, ziyreklik oyını, psixologiyalıq trening, kitapqumarlıq, IT baǵdarı hám sport jarısların baqlap bardı hám de ótkerilgen ilajlar sheńberinde óz pikir usınısların bildirdi.
Ilajǵa jazıwshılar awqamı aǵzaları da qatnasıp, kitapqumar jaslar menen ushırasıp, oqıwshı jaslarǵa ádebiyat baǵdarı sırların úyretti.
Mekteplerde shólkemlestirilgen ilajlarda rayon hákimligi tárepinen qımbat bahalı sıylıqlar toplamları, sport ánjamları, kitaplar toplamı, kompyuter texnikaları, tigiw mashinaların saltanatli túrde tapsırdı. Sonday-aq oqıw jılı dawamında ótkerilgen pánler olimpiadası, kórik-tańlawlar, sport jarıslarında, ilajlarda belsene qatnasqan oqıwshılar hám olardıń ata-anaları rayon hákiminiń minnetdarshılıǵı menen húrmet jarlıqlar hám qımbat bahalı sawǵaları menen múnásip sıylıqlandı.