2022-jıldıń 5-avgust kúni Qaraózek rayonı hákimi U. Utambetov hám «Esim» MPJ turǵınları menen birgelikte, usı aymaqtaǵı 26-sanlı mektep aymaǵınan jańadan qurıp pitkerilgen jasıl qaplamalı maydanshanıń saltanatlı túrde ashılıw máresimine qatnastı.

Bul qurılısta “Esim” APJ aymaq turǵınları “Ashıq byudjet” joybarında óz belsendiligin kórsetip, jeńimpazlıqqa eristi hám 504 mln swm qarjı ajıratılıp, zamangóy túrdegi futbol maydanshası qurılıp berildi. Maydanshanıń qurılıs jumısların rayondaǵı “Qaraqum Abbaz” JShJ niń qurılısshıları alıp bardı.
Usı kúni sport maydanshasında sporttıń futbol túrinen rayon hákiminiń kubogi ushın jarıs shólkemlestirilip, aymaq jasları óz-ara keskin bellesti.

Jarıs sońında jeńimpazlarǵa rayon hákimliginiń húrmet jarlıqları menen qımbat bahalı sawǵaları tapsırıldı.
Sonday-aq «Esim» MPJ aymaǵındaǵı jollar ońlanıp, sporttıń kishi futbol, voleybol, basketbol sport maydanshaları hámde «Workout» sport maydanshaları qurıp pitkerildi.
Álbette jaslarımız bul jaratılǵan bárshe imkaniyatlardan únemli paydalanıp, keleshekte sporttıń usı túrlerinen úlken nátiyjelerge erisedi degen úmittemiz.

Qaraózek rayonı hákimligi málimleme xızmeti.