Qaraqalpaqstan Respublikası Ádillik ministrliginiń Is-rejesine tiykar hár jılı ótkeriliwi dástúrge aylanǵan «Ádillik seyili» bıyıl «Insan qádri ushın» súreni astında Nókis qalasınıń «Istiqlol» balalar dem alıw orayında start alǵan bolsa, ekinshi basqıshı elimizdiń jáne bir payızlı ornı sanalǵan Qaraózek raynınıń «Ǵárezsizlik maydanı» nda bolıp ótti.
Ádillik seyilin ótkeriwden tiykarǵı maqset, xalıqtıń huqıqıy sana hám huqıqıy mádeniyatın joqarılatıw hámde nızamlılıqtı bekkemlew, mámleketlik uyımlardıń tiykarǵı wazıypalarınan xalqımızdı xabardar etiw, keleshegimiz iyeleri bolǵan jaslarımızdı watan súyiwshilik ruwxında tárbiyalaw, puqaralarǵa huqıqıy, medicinalıq, psixologiyalıq másláhátler beriw hám basqa bir qatar wazıypalardan ibarat bolıp esaplanadı.

Iláj dawamında rejelestirilgen «Biz birgemiz», «Biz salamatlıq turmıs tárepdarımız» sıyaqlı akciyalar hámde elimiz nızamshılıǵındaǵı ámelge asırılıp atırǵan reformalar haqqında túsinikler berilip, respublikamızda óz iskerligin kórsetip kiyatırǵan barlıq mámleketlik uyımları wákilleri, sol qatarda Ádillik ministrligi xızmetkerleri tárepinen xalıqtıń ózin qızıqtırǵan sorawlarına túsinikler berilip hámde olardıń múrájatların usı orınnıń ózinde qabıl etip alǵan bolsa, shıpakerlerimiz tárepinen biypul medicinalıq kórikten ótkeriw ilájları hámde Xalıq bántligine kómeklesiw orayı tárepinen miynet yarmarkaları shólkemlestirildi.

Seyil dawamında 20dan aslam puqaranıń múrájatları tıńlanıp ornında túsinikler berildi hamde 6 puqaranıń múrájatı belgilengen tártipte úyrenip shıǵıw ushın ádillik bolimi tárepinen qabıl etildi.
Seyil qatnasıwshılarına kóterińki keypiyattı inám etiw maqsetinde mádeniyat xızmetkerleriniń ájayıp koncert baǵdarlamaları, ádillik uymları menen birge islesiwshi jámiyet aǵzalarınıń qol ónerlerinen tayarlanǵan kórgizbeleri, sport ilájların tamashalaw menen birge, sawǵalı viktorinalarda qatnasıp, ózleriniń bilimlerin jáne bir márte sınawdan ótkerip estelik sawǵaları menen sıylıqlandı.

Qaraózek rayonı hákimligi málimleme xızmeti.