Usı jıldıń 11-noyabr kúni Qaraqalpaq mámleketlik universitetiniń mádeniyat sarayında jańa redakciyadaǵı Miynet kodeksiniń mazmun mánisine arnalǵan seminar bolıp ótti.
Onda Oliy Majlis Nızamshılıq palatası Spikeri orınbasarı Zuxra Ibragimova, Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev, senatorlar, deputatlar, ministrlik hám mákemeler wákilleri, kárxana hám shólkemler basshıları sonıń menen birge student jaslar qatnastı.
Seminarda jańa redakciyadaǵı Miynet kodeksiniń mazmun mánisin huqıqtı qollawshılarǵa túsindiriw, onıń orınlanıwın támiyinlew sıyaqlı áhmiyetli máseleler talqılandı.
Atap ótilgenindey, sonǵı jıllarda Ózbekstanda miynet qatnasıqlarına jańasha jantasıw júzege keldi. Múlk iyeleri hám jumıs beriwshilerdiń sanı keskin arttı. Fizikalıq shaxslarǵa da jumıs beriwshi statusı berildi. Bulardıń barlıǵı miynet bazarında jańa reformalardı talap etedi.
Bunday sharayatta miynet nızamshılıǵın modernizaciyalaw menen baylanıslı wazıypalardı ámelge asırıw dáwir talabı esaplanadı. Usı tárepten jańa Miynet kodeksi joybarı islep shıǵıldı hám bul proceste 10 nan aslam xalıqaralıq shólkem, sonnan, xalıqaralıq miynet shólkeminiń bir qatar konvenciyaları, 60 tan aslam mámleket tájiriybesi úyrenildi.
Seminarda shıǵıp sóylewshiler usı hújjet tarawdaǵı bir qatar mashqalalardı, miynet bazarındaǵı jaǵdaydı esapqa alıp, bazar ekonomikası talaplarınan kelip shıqqan halda, nızamlı sheshiwde, islegen jumısına, jumıs beriwshi bolsa kirgizgen qarjısına múnásip tárizde itibar hám xoshametlewge iye bolıwın kepilleytuǵın áhmiyetli huqıqıy tiykar bolıp xızmet etetuǵınlıǵı atap ótildi.
