Ózbekstan Respublikası Prezidentiniń 2021-jıl 9-avgust kúngi “Jetim balalar hám ata-ana qaramaǵınan ayrılǵan balalardı mámleket tárepinen qollap-quwatlawdıń jańa sistemasın en jaydırıw ilajları haqqında” ǵı PQ-5216 sanlı qararına tiykarlanıp, baǵıwshısın joǵaltqan jaslarımızdı sociallıq jaqtan qorǵaw olardı turaq jay menen támiyinlew málesine ayrıqsha itibar qaratılmaqta.
Álbette, milletimizge say bolǵan mexir miriwbetlilik, ǵamxorlıqqa mútáj insanlarǵa járdem kórsetiwge qaratılǵan bul baslama búgin hár bir aymaqta óziniń ámeliy tastıyǵın tappaqta.
Qaraózek rayonındaǵı “Qaraózek” APJ aymaǵında jasawshı Dilbar Uzaqbaeva da kem támiyinlengen ǵamxorlıqqa mútáj bolǵan jaslardıń biri edi.

Bıyılǵı jıl onıń ushın quwanıshlı xabarı menen este qalarlıq boldı sebebi, oǵan rayondaǵı kóp qabatlı turaq jaylardan barlıq qolaylıqlarǵa iye úsh xanalı turaq jay sawǵa etildi.
Búgin rayon hákimi U. Utambetov tórt sektor basshıları menen birgelikte D. Uzaqbaevaǵa turaq jayınıń giltin tapsırıp, qızımızǵa jaqsı tileklerin bildirdi hám sharayatları menen tanısıp shıqtı.
Bunnan soń, D. Uzaqbaeva Prezidentimizdiń jaslarǵa jaratıp atırǵan imkaniyatlarına kewli tolıp óz minnetdarshılıǵın bildirdi.

Qaraózek rayonı hákimliginiń málimleme xızmeti