Qaraózek rayonı hákimiyatınıń májilisler zalında Ózbekstan Qaharmanı, marhum Musa Tajetdinovich Erniyazovtıń 75 jıllıǵına arnalıp eslew keshesi ótkerildi.
Onda rayon hákimi U. Utambetov, bir qatar nuranıylar shıǵıp sóylep, Musa Tajetdinovichtıń derlik 50 jıllıq miynet jolı dawamında xalqımız ushın islegen miynetleri, Qaraqalpaqstan Respublikasınıń sociallıq-ekonomikalıq rawajlanıwına, xalqımızdıń turmıs párawanlıǵınıń artıwına, xalqımız hám mámleketimizge sadıqlıq penen, hadal jáne pidákerlik penen xızmet etken insan ekenligine toqtap ótti.
Haqıyqatınanda Musa Tajetdinovich Erniyazov Qaraqalpaqstannıń haqıyqıy perzenti, haqıyqıy qaharmanı edi.

Ol bir ómir ózi sıyaqlı aq kókirek, tuwrı sózli hám kishipeyil adamlar menen birge bolıp, hár bir puqaranıń dárti hám táshwishi menen jasadı.
Usınday iygilikli isleriniń arqasında Musa Tajetdinovich qaraqalpaq xalqınıń mehiri hám húrmetine eristi.
Eslew keshesi sońında qatnasıwshılarǵa M. Erniyazovtıń islegen dáwirindegi qayırlı isleri videorolikler arqalı tanıstırıldı.
Keshe sońında marhumnıń ruwxına duwalar oqıldı.

Qaraózek rayonı hákimligi málimleme xızmeti