2022-jıldıń 28-dekabr kúni Qaraózek rayon hákimliginiń májilisler zalında, Qaraqalpaqstan Respublikası Ministrler Keńesiniń Baslıǵı F. Ermanovtıń basshılıǵında májilis bolıp ótti.
Májiliske rayondaǵı tórt sektor baslıqları, awıl xojalıǵına tiyisli Ministrlikler, fermerler menen hákim járdemshileri qatnastı. Májiliste egislik maydanlardıń shorın juwıw, báhárgi egiske puqta tayarlıqlar kóriw boyınsha rayondaǵı bir qatar tiyisli taraw basshılarınıń esabatları tıńlındı.
Sonday-aq, máhállelerde isbilermenlikti rawajlandırıw hám jeńilletilgen kreditler arqalı puqaralardıń bántligin támiyinlew, qurılıs tarawındaǵı ishki jollar, ishimlik suwı, gaz, elektr tarmaqlarındaǵı nasazlıqlar hámde sociallıq obektlerdiń qurılıs jumısları boyınsha islenip atırǵan jumıslar kórip shıǵılıp, jiberilgen qáte-kemshilikler qatań túrde sınǵa alındı.

Májilis sońında puqaralarımızdı kámbaǵallıqtan shıǵarıw, jaslardıń bántligin támiyinlew, hayal-qızlarımızǵa jańa jumıs orınların jaratıw baǵdarında hákim járdemshileri menen hayal-qızlar belsendileriniń usınıs pikirleri tıńlandı.
Bunnan soń mámleketlik baǵdarlamalardıń orınlanıwı boyınsha tiyisli taraw basshılarına wazıypalar belgilep berildi.

Qaraózek rayonı hákimliginiń málimleme xızmeti