Qaraózek rayonı boyınsha gaz támiynatı jetip barmaytuǵın aymaqlarda gúz-qıs máwsimi dawamında qıyınshılıqlardıń aldın alıw maqsetinde ámeliy ilajlar kɵrilip, xalıqtı suyıltırılǵan gaz benen támiyinlew jumısları alıp barılmaqta.
Búgingi kúnde rayon boyınsha ulıwma 3783 jeke xojalıq hám 6 mektepke shekemgi bilimlendiriw mákemeleri shártnama tiykarında suyıltırılǵan gaz hám gaz ballonlar menen támiyinlengen.

Rayon orayınan eń shette jaylasqan «Qoybaq», «A. Dosanazarov», «Ak. S. Kamalov», «Mádeniyat», «Quralpa», «Esimózek» hám «Qaraózek» APJ puqaraları óz waqtında gaz ballonlar menen támiyinlenbekte.
2023-jılı tutınıwshılarǵa yanvar ayı ushın 55,06 tonna suyıltırılǵan gaz jetkerip beriw rejelestirilgen bolıp, ay basınan 20-yanvar kúnine shekem 30,24 tonna suyıltırılǵan gaz ballonlar tastıyqlangan grafik tiykarında jetkerip berildi.
Suyıltırılǵan gaz benen támiyinlengen tutınıwshılarda jámi aylanbadaǵı gaz ballonlar sanı 7036 dananı quraydı.
Sonlıqtan 2022-jılı tutınıwshılarǵa jıl dawamında 671,560 tonna suyıltırılǵan gaz jetkerip beriw rejelestirilgen bolsa, nátiyjede puqaralarǵa 712,940 tonna suyıltırılǵan gaz tarqatılıp, reje 106,2 % ke orınlandı.

Qaraózek rayonı hákimliginiń málimleme xızmeti