2023-jılı Qaraózek rayonında 61 joybar iske túsiriledi

Búgingi kúnde Qaraózek rayonında Máhállebay islew hám isbilermenlikti rawajlandırıw baǵdarında Joqarǵı Keńes baslıǵınıń tikkeley basshılıǵında bir qatar jumıslar ámelge asırılmaqta.
Bul baǵdarda rayon aymaǵındaǵı 13 máhállege tayınlanǵan hákim járdemshileri tárepinen úyme-úy kirip shıǵıw arqalı xalıqtıń mashqalaların úyreniw jumısları alıp barılmaqta.
Házirgi waqıtta 9073 xojalıq tolıq úyrenilip, 4 kategoriyaǵa ajıratıldı:
1-kategoriya turaqlı dáramat deregine iye bolmaǵan, dáramat tabıwǵa háreket etip atırǵan shańaraqlar, 2-kategoriya turaqlı dárámat deregine iye, qosımsha dáramat tabıwdı qálewshiligi bolǵan shańaraqlar, 3-kategoriya sociallıq qorǵawǵa mútáj, baǵıwshısın joǵaltqan, mayıplıǵı bolǵan shańaraqlar, 4-kategoriya ekonomikalıq jaqtan ózine toq bolǵan shańaraqlar bolıp, bul shańaraqlardıń bántligin támiyinlew máselesi boyınsha hákim járdemshileri tárepinen jumıssız puqaralardıń bántligi támiyinlendi.

Atap aytqanda, rayon aymaǵında jeńilletilgen kredit alıp óz isbilermenligin baslamaqshı bolǵan, 922 puqaraǵa 19 mlrd 187 mln swm muǵdarında jeńilletilgen kreditler ajıratılǵan bolsa, subsidiya tiykarında 164 puqaraǵa 1 mlrd 297 mln swm kóleminde ásbap úskeneler ajıratıp berildi.
Sonday-aq , turaqlı jumıs penen támiyinlengen 2 881 puqara, ózin-ózi bánt etken puqaralar sanı 1 461 di, jeke tártiptegi isbilerlik subektleri sanı 125 di, yuridik tártiptegi isbilermenlik subektleri sanı 108 di quraǵan bolsa, 16 awıl xojalıǵı kooperaciyaları shólkemlestirilip 353 puqaranıń bántligi támiyinlendi.
Jaslarımızdıń kásip-ónerge qızıǵıwshılıǵın arttırıw hám belgili bir kásipke baǵdarlaw maqsetinde, 530 puqara kásip-ónerge qayta oqıtıldı hám Namangan walayatınan alıp kelingen konteynerler esabınan 35 puqaranıń bántligi támiyinlendi.
Sonıń menen bir qatarda, Qaraózek rayonı hákiminiń birinshi orınbasarı Q. Azerbaev, Respublikadan bekitilgen wákili D. Matniyazov, Máhállebay islew hám isbilermenlikti rawajlandırıw orayı baslıǵı T. Qaljanovlar tárepinen atalıqqa alǵan 36 isbilermenlik subektleri, rayon aymaǵındaǵı hákim járdemshileri tárepinen 58 isbilermenlik subektleri tolıǵı menen iske túsirildi.
2023-jıldıń birinshi sheregi dawamında 61 isbilermenlik subektlerin iske túsiriw rejelestirildi.