Nawrız bayramınıń tákirarlanbas ózgesheligi bar, ol hár bir úyde, hár bir elde, pútkil jer júzinde tınıshlıq hám tatıwlıqtı saqlawǵa shaqıradı. Bul bayramda hár qıylı ókpe hám giyneler umıtıladı, urıs jánjeller toqtaydı, óz-ara kelisim, tatıwlıq, adamgershilik júzege keledi.
Áyyemnen kelip jetken bunday muqáddes dástúrlerimizdi qádirlew, teberik jası úlkenlerimizdiń duwasın alıw hám nawqaslardan xabar alıw bul bayramnıń jáne bir pazıyletleriniń biri bolıp tabıladı.

Nawrız ulıwmaxalıqlıq bayramı múnásibeti menen rayonımızdaǵı sport maydanshada bayram seyilleri ótkerilmekte.
Onda rayon hákimi U. Utambetov, Qaraqalpaqstan Respublikası Joqarǵı Keńesiniń komitet baslıǵı D. Utambetovlar bárshe bayram qatnasıwshılardı ulıstıń ullı kúni «Nawrız» bayramı menen qızǵın qutlıqladı.
Bayram seyili milliy oyınlarımız esaplanǵan, qoshqarlar dúgisi, qoraz urıstırıw, palwanlar gúresi sıyaqlı basqa da milliy oyınlarda qatnasıwshılar bas bayraq ushın óz-ara bellesti hám jeńimpazlar qımbat bahalı sawǵalar menen sıylıqlandı.
Bunnan soń xalqımızǵa inam etilgen koncert baǵdarlamaları hám saxnalastırılǵan bayram tamashaları jıynalǵanlarǵa úlken zawıq baǵıshladı.
Rayonımız boylap bayram seyilleri dawam etpekte.

Qaraózek rayonı hákimliginiń málimleme xızmeti