Ótken jılı rayonnıń diyqan-fermerleri 3800 gektar maydanǵa egilgen biydaylarǵa agrotexnikalıq qádelerge say tárbiya beriwi nátiyjesinde ózleri diydilegendey zúráát jetistiriwge eristi.
Házirgi waqıtları rayon aymaǵındaǵı biyday atızları bir tegis ırǵalısıp, tolıq pisiwge shamalastı.
Búgin rayonda jetistirilgen biyday ónimlerin sepsitpey jıynap alıw hám kombaynlardıń ǵálle orımı máwsimine tayarlıǵın kózden ótkeriwge baǵıshlanǵan kórgizbeli seminar ótkerildi.
Oǵan Respublikadan biriktirilgen jumısshı topar aǵzaları, rayondaǵı sektor basshıları həm awıl xojalıǵı tarawı xızmetkerleri qatnastı.
Onda rayon hákimi U. Utambetov hám tiyisli tarawlardıń juwapker xızmetkerleri shıǵıp sóylep, bıyılǵı orım-jıyın jumısların qısqa múddetlerde, sapalı juwmaqlaw ushın tiyisli másláhátler berildi.
Sonday-aq, ilajda ǵálle oraǵına qatnasatuǵın texnikalardıń sazlıǵı tekserilip, ámeldegi tártip-qaǵıydalar túsindirildi.
Qaraózek rayonı boyınsha bıyıl gúzlik biyday orım-jıyını mapazına 15 zamanagóy kombaynlardıń qatnasıwı belgilengen bolıp, olar búgingi kúnde texnikalıq jaqtan tolıq tayar halatqa keltirilgen.

Qaraózek rayonı hákimliginiń málimleme xızmeti