Ózbekstan Respublikası Prezidentiniń 2022-jıl 19-iyuldaǵı PQ-325-sanlı qararınıń orınlanıwın támiyinlew maqsetinde Qaraózek rayonı Qoybaq APJ “Qarataw” massivinde “Tebinbulaq káni negizinde kán-metallurgiya kompleksin qurıw” joybarı boyınsha jámiyetlik sáwbetleri bolıp ótti.
Oǵan joybar basshıları, taraw qánigeleri, ekolog alımlar, jámiyetshilik wákilleri menen rayonınan bir topar nuranıylar qatnastı.
Rayon orayınan barǵan nuranıylar joybar boyınsha óz pikirlerin bildirip, “Tebinbulaq” kánin ózlestiriw tiykarında kán-metallurgiya kompleksiniń qurılıs montajlaw jumıslarınıń barısı menen tanıstı. “Tebinbulaq” karerinde kán-metallurgiya kompleksin qurıw jumısların “Triangul-metals Tebinbulaq” kompaniyası alıp barmaqta.
Olar 2023-jıldıń 1-iyun sánesinen tájiriybe uchastkasında taw jınısların qazıp-alıw islerin baslap jiberdi.
Joybar boyınsha bul kánde 1,5 mlrd tonna temir rudası zaxiraları bolıp, jılına 58 mln tonna ruda qayta islenedi, ruda quramındaǵı temir muǵdarı 12,6 payızdı quraydı.
Keleshekte bul qurılıs obektinde 5000 adamǵa jańa jumıs orınları jaratıladı hám islewshiler ushın 10000 adamǵa mólsherlengen qalasha salınadı.

Qaraózek rayonı hákimliginiń málimleme xızmeti