Búgin Qaraózek rayonı Mádeniyat orayı májilisler zalında «Ustazlar milliy forumı» májilisi bolıp ótti. Forumdı rayonlıq mektepke shekemgi hám mektep bilimlendiriw bólimi baslıǵı A. Kalilaev ashtı hám basqarıp bardı.
Oǵan rayondaǵı tórt sektor baslıqları, hákim orınbasarları, nuranıy ustazlar, mákeme, kárxana basshıları, rayonlıq mektepke shekemgi hám mektep bilimlendiriw tarawı wákilleri, mektep direktorları hámde tájiriybeli pán muǵallimleri qatnastı.
Májiliste rayon hákimi U. Utambetov hám bir qatar nuranıy ustazlar shıǵıp sóylep, bárshe ustazlardı jaqınlasıp qalǵan jańa oqıw jılı menen qızǵın qutlıqlap, ótken jılǵı bilimlendiriw tarawındaǵı jetiskenliklerdi maqtanısh etip, jas ustazlarǵa ózleriniń aqıl keńeslerin berip ótti.

Májilis juwmaǵında jıl dawamında bir qatar jetiskenliklerge erisken bilimlendiriw tarawı pidayıları rayon hákimliginiń, Qaraqalpaqstan Respublikası Mektepke shekemgi hám mektep bilimlendiriw ministrligi, rayonlıq mektepke shekemgi hám mektep bilimlendiriw bólimi hám Ózbekstan bilimlenliriw hám ilim xızmetkerleri kásiplik awqamı rayonlıq Keńesi tárepinen tayarlanǵan húrmet jarlıqları hámde bahalı sawǵaları menen sıylıqlandı.
«Ustazlar milliy forumı» sekciya májilisleri mektep direktorları, direktor orınbasarları hám tájiriybeli pán muǵallimleri qatnasında dawam etip, 17 baǵdardaǵı pán sekciyalarında 483 bilimlendiriw tarawı xızmetkerleri jańa 2023-2024-oqıw jılında bilimlendiriw tarawındaǵı jańalıqlar menen tanıstı hám alda turǵan wazıypalardı belgilep aldı.
Qaraózek rayonı hákimliginiń málimleme xızmeti