Qaraózek rayonınıń paxtakeshleri bıyılǵı jıldıń báhár máwsiminde 4700 gektar maydanǵa shigit taslap, onnan diydilengendey ónim topladı.
Rayonda awıl-xojalıǵı tarawındaǵı jumıslardıń sapalı alıp barılıwı nátiyjesinde, miynetkesh diyqanlardıń mashaqatlı miynetleri arqasında paxta atızlarında mol ónim toplandı.
Mámleketimiz qırmanına fermer xojalıqları tárepinen 11750 tonna paxta tapsırıw rejelestirilip, onıń kópshilik bólegin joqarı sortlarǵa satıwdı niyet etken.

Búgin rayon hákimi U. Utambetov, sektor basshıları hám awıl xojalıǵına tiyisli mákemeler menen fermer xojalıǵı baslıqlarınıń qatnasıwında paxta zúráátiniń dáslepki tonnaları qabıllandı.
Qabıllawda rayon hákimi paxta jıyın-terimi jumısların talapqa say ótkeriw, toplanǵan zúráátti qısqa múddette sepsitpey sapalı etip terip alıw boyınsha atap ótti.

Sonday-aq, terimshiler ushın atız baslarında barlıq qolaylı jaǵdaylar jaratıw boyınsha fermer xojalıq baslıqları menen tiyisli kánigelerge tapsırmalar berdi.
Usı kúni birinshilerden bolıp paxta tapsırǵan fermer xojalıqların qımbat bahalı sawǵalar menen sıylıqladı.
Solay etip, búginnen baslap rayonnıń fermer xojalıqlarında paxta jıyın-terim mapazı shólkemleskenlik penen baslanıp ketti.
Bunnan soń, rayon hákiminiń basshılıǵında “Gúlziba Reym” fermer xojalıǵında fermerler hám otryad baslıqları menen ushırasıw ótkerilip, olardıń atqaratuǵın wazıypaları túsindirilip, jıyın-terimniń baslanıwı menen qızǵın qutlıqladı.
Ushırasıw sońında, qatnasıwshılarǵa bayram dásturxanı jayılıp koncert baǵdarlamaları qoyıp berildi.

Qaraózek rayonı hákimligi málimleme xızmeti