Qaraqalpaq teatr kórkem óneriniń rawajlanıwında salmalı úles qosıp kiyatırǵan, atqarǵan rolleri menen tamashagóylerdiń alǵısına bólenip júrgen talantlı aktyor, Qosımbetov Ómirbay Sarsenbaevich 1963-jıl 22-aprel kúni Qaraózek rayonında isshiler shańaraǵında dúnyaǵa keledi.
Ol balalıq jıllarınan baslap-aq aktyor bolıwǵa qızıǵıp, mektepte ótkerilgen bayram keshelerinde qosıq aytıp, kishigirim saxnalıq kórinislerde roller atqarıp júredi.
1980-jılı orta mektepti pitkergennen soń, sol waqıttaǵı A.N.Ostrovskiy atındaǵı Tashkent mámleketlik teatr hám súwretshilik institutınıń muzıkalı drama aktyorlıǵı bólimine oqıwǵa kiredi. Institutta saxnalastırılǵan barlıq diplom spektakllerinde bas qaharman rollerin sheberlik penen atqarıp shıǵadı.
1985-jılı instituttı pitkerip miynet jolın, Berdaq atındaǵı Qaraqalpaq mámleketlik akademiyalıq muzıkalı teatrında vokal artisti bolıp islewden baslaydı.
Tábiyat inam etken sın-sımbat penen ilahiy talantı, jáne tınımsız miynetleri arqasında teatr jámááti arasında kózge túsip, húrmetke iye bola basladı.Teatrǵa keliwi menen hár qıylı janrlarda saxnalastırılǵan spektakllerde hár qıylı xarakterdegi qaharmanlar obrazların jarattı.
Miynet jolı dawamında saxnada 50 den aslam roller oynadı. Onıń atqarǵan hár bir roli milliy koloritke bay. Qaharmanları ishki dúnyasın ashıp bere alǵan. Olardıń dárti, quwanıshın kórsetip xalıq alǵısına miyassar bolıp keledi. Keń diapazonǵa iye aktyor bolıw menen birge kóbirek komik aktyor sıpatında xalıqqa tanıldı.
Teatrda atqarǵan rollerinen: “Maysaranıń hiylesi” operasında Molla Dos, “Ójet” komediyasında Aytjan, “Qıyanet” dramasında qarawıl, “Balkondaǵı názálim” dramasında Attilio, “Xoja Nasretdin ólmeyjaq” komediyasında Xoja Nasretdin, “Xanuma” muzıkalı komediyasında Kote, “Ómirbek hám Tazsha” komediyasında Ómirbek, “Ǵárip ashıq” muzıkalı dramasında Ǵárip, “Ádalatqa qıyanet” dramasında Patsha, “Alpamıs” muzıkalı dramasında Kókaman, “Ájiniyaz” operasında Ulama, “Ush boydaq” hám basqada obrazları tamashagóyler júreginen orın alǵan.
Ó.Qosımbetov talantlı aktyor bolıw menen birge uqıplı shólkemlestiriwshi. 2008-jılı Ózbekstan mámleketlik kórkem óner hám mádeniyat institutınıń Nókis filialı ashılıwında úlken miynet etti. 2008-2013-jıllar dawamında usı institut filialında direktor lawazımında isledi hám oqıtıwshılıq etti. Onıń usı dáwirde oqıtqan oqıwshıları búgingi kúni Respublikamızdıń kórkem óner tarawında belgili xızmetlerdi atqarıp kiyatır.
Respublika kóleminde ótkeriletuǵın Ǵárezsizlik, Nawrız ulıwmaxalıqlıq bayram tamashalarında qatnasıp, 1992-2000-jılları Tashkent qalasında, 1990-2001-jılları Xorezm oblastında ótkerilgen Qaraqalpaqstan Respublikası mádeniyat hám kórkem óner kúnlerinde, 1995-jılı Yuneskonıń qararı menen ótkerilgen Uluǵbek babamızdıń 600 jıllıǵına baylanıslı Angliya, Franciya mámleketlerinde Anjumanlarda, 2001-jılı Hindistanda mádeniy oraydıń dúzilgenine 50 jıl tolıw múnásibeti menen ótkerilgen úlken mádeniy ánjumanlarda qatnastı.
2014-jıl juwmaǵı menen Tashkent qalasında ótkerilgen «Etirof-2014» tańlawında “Suw kórmey etik sheshpe” spektaklinde atqarǵan Chori shaqqan roli menen “Jıldıń eń jaqsı erkek roli” nominaciyası menen sıylıqlandı.
Ó.Qosımbetov Respublikamız boylap tez-tez dóretiwshilik saparlarda bolıp turadı. Jaslar menen ushırasıp ruwxıylıq keshelerin ótkeriwde belsendilik kórsetip keledi.
Onıń miynetleri waqtında bahalanıp, 1997-jılı Ózbekstan Respublikasında xızmet kórsetken artist, 2000-jılı Qaraqalpaqstan Respublikası xalıq artisti húrmetli ataqları berildi. Ózbekstan Respublikası Ǵárezsizlik bayramı múnásibeti menen “Watan pidayısı” kókirek nıshanı menen sıylıqlandı.
Usınday jerlesimiz, belgili aktyordıń 60 jasqa tolǵan yubiley keshesi rayondaǵı “Mádeniyat sarayı” nda ótkerilip, oǵan rayon hákimi U. Utambetov, Respublikamızǵa belgili mádeniyat xızmetkerleri, aktyordıń tuwǵan-tuwısqanları menen klasslasları hám shákirleri qatnastı.
Onda shıǵıp sóylewshiler, Ó. Qosımbetovtıń Qaraqalpaq teatr kórkem-óneriniń rawajlanıwındaǵı salmalı úlesi, onıń atqarǵan rolleriniń hár biri tereń mazmunǵa iye hám jaslarımız ushın tárbiyalıq áhmiyeti joqarı ekenligine toqtap ótti.
Iláj dawamında Ó. Qosımbetovqa rayon hákimliginiń qımbat bahalı sawǵaları tapsırılıp, húrmet-izzet kórsetildi.
Qaraózek rayonı hákimligi málimleme xızmeti
